Këtë të enjte (8, 09, 2020) një grup anëtarësh e simpatizantësh të NGO-së (OJF)”Shoqata e Miqve Parizienë”, protestoi para ndërtesës së ambasadës sonë në Paris.
Kjo shoqatë mbështet kauzën e ish anëtarëve të organizatës ish terroriste MEK. Iranianët protestues mbanin parrulla të ndryshme kundra MEK-ut si edhe parrulla me kërkesa për qeverinë shqiptare. Protestuesit i dorëzuan diplomatëve tënë në Paris një peticion të nënshkruar nga mijëra vetë. Në peticion i bëhet apel qeverisë shqiptare, që të mos shkelë të drejtat e njeriut, por të pajisë me viza ata shtetas iranianë, që janë të afërm: motra, vëllezër, nëna, baballarë, bija e bij, nipa e mbesa të iranianëve të mbyllur në Kampin Ashraf 3 në Njësinë Administrative Manëz në Bashkinë e Durrësit. Në peticion kërkohet pajisja me viza shqiptare e këtyre iranianëve, me qëllim që ata të takojnë të afërmit e tyre, disa prej të cilëve nuk i kanë parë me sy dhe nuk ua kanë dëgjuar zërin, që prej 30 e më shumë vjetësh.
Ky është një telash shtesë për ambasadat shqiptare kudo në botë. Protesta dhe dorëzimi i peticionit në përfaqësinë tonë diplomatike në Francë është thjesht “zgalemi”, që paralajmëron stuhinë, dmth serialin e protestave me të njejtën temë: mbrojtjen e të drejtave të njeriut të këtyre iranianëve etnikë.
Fatkeqësisht ka të ngjarë, që nëse qeveria shqiptare nuk ua vë veshin këtyre protestave dhe këtij peticioni, ambasadat shqiptare gjithnjë e më shumë do t’u ngjajnë ambasadave të kohës së diktaturës komuniste. Para rënie së komunizmit ishte gjë e zakonshme, që para ambasadave tona në vendet perëndimore të protestohej për shkeljen e të drejtave të njeriut në Shqipërinë ateiste të diktatorit Enver Hoxha dhe më pas të diktatorit Ramiz Alia!
Fatkeqësisht këto protesta janë një pjesë e vogël e kostos, që do të paguajë Atdheu im për strehimin në Shqipëri të anëtarëve ende të radikalizuar të Kultit Rajavi (ish organizata terroriste MEK).
GJERGJI THANASI, Ashraf News